I CONFERENZE IN LENGUA LOMBARDA

El contribut qe sii dree a lejer a l’è scrivud con la ortografia elaborada dal Lissander Brasca e presentada ind el liber Scriver Lombard, Edizion Menaresta. L’è una grafia comuna qe la serviss de far de manera qe ogni lombardofon al poeda drovar el so dialet local (quell qe lu l’ha semper parlad), per produr dei tests comunegativament importants, de interess soralocal, comprensibel per tuts i alter lombardofon.

Senza star lì trop a spiegar comè qe la fonziona, al sarà assee dir qe onidun al g’ha de lejer el test compagn qe lu le prononziaria istintivament, ind el so dialet.

I CONFERENZE IN LENGUA LOMBARDA inn organizade da la Simona Scuri - qe son mi quella - e dal Lissander Brasca. La prima l’hem faita ind el lui 2012 a Monça, in collaborazion cont el MilesiLab, un spazi creativ d’art, ideal anca per ospitar i noste conferenze.
La particolaritaa de qei conferenze qì a l’è qe inn esclusivament in lengua lombarda. El relador al parla in lombard, i domande del publeg inn faite in lombard. Perqè ? Al ciamarà un quaivun. Perqè no ? Ge respondom num.

La lengua lombarda a l’è recognossuda da l’UNESCO, l’Organizazion dei Nazion Unide per l’Educazion, la Scienza e la Cultura, ind el Atlas of the World’s Languages in Danger (catalogada cont el codex ISO 639-3lmo) insema a plussee de 2400 lengue in pericol d’estinzion. A l’è una lengua qe la g’ha una storia importanta, prestijosa, cont una soa literatura scrivuda, una stralonga tradizion oral qe la va indree ind i secol. L’è parlada anc’mò da plussee de ses milon de persone e la g’ha tut el dirit de vesser rispetada tant ‘mè i altre lengue del mond.

Olter qe una bella situazion convivial, i conferenze in lengua voelen vesser una ocasion per mostrar cont i fats una veritaa semplicissima (e in realtaa banalissima) : in lombard se poe parlar de qualsessia argoment, de manera formal e informal. L’entrada a l’è libera e a la fin de ogni conferenza a g’è el moment plussee viscor, quell dei domande.

Ai “altre” conferenze de solit ben in poc fann dei domande, a g’è timideza, incerteza… ma al MilesiLab a l’è propi tut l’incontrari. A l’è dificil fermar i domande qe riven jo a cascada apena qe el relador l’ha terminad el so discors.

I relador, qe se dann la muda, riven da divers sits de la rejon lombardofona e g’hann etaa diverse (el plussee jovin a l’è del ‘86): da la Brianza, da Milan, da la Vall Seriana, dal Canton Texin, da Bressa, dal Mantovan da la Bassa pavesa e da olter sits anc’mò. Ma tute qei variant geografe qì inn totalment comprensibil intra de lor e questa qì a l’è la sorpresa plussee bella de tute.
I argoments inxubids ind i inconter inn divers ogni voelta: un itinerari a pee de 415 km qe collega 25 santuari marian de la Brianza, el “Seed saving” sariss a dir l’art de meter via la somenza dei piante da ort, o anca “la moda in Sardegna”, o la storia de la eleganta “sperada”, o - problema purtrop ben atuai - “l’ansia e la depression”. La segonda conferenza per esempi, quella dedegada al Seed saving, l’ha faita un relador bergamasc. La comprension da part del publeg a l’è staita total. L’è domà una question de un quai menut de abituden e se rendom cunt qe la diferenza l’è no inscì granda comè serom usads a pensar: l’è assee scoltar. Despess se sent dei jent qe dixen : ‘mi parli diversament da qell scior là, qe al sta de ca a tot km de ca mia’. Ma quante inn i diferenze e quants a inn, in scambi, i elements in comun?

La veritaa a l’è domà qe incoe sem semper manc usads a sentir parlar el Lombard in jir, foera de ca nosta. Un quai deceni indree, quand qe l’italian le parlaven anc’mò in poc, a l’era del tut normal sentir parlar intra de lor, ognidun ind el so dialet e intendendes perfetament, do o tre o dex persone qe rivava ognidun da una provinça lombardofona diversa.
‘Normalment, fina a un quai deceni indree, tuts parlaven lombard, anca ind i ofici tecneg, ind el ofici del nodar o de l’injenier o del designer de sucess, ind i ofici dei professor universitari, ind i salots dei intelletuai’ (op. cit. Scriver Lombard)

Intra i ospits dei conferenze, podevom no far senza del Yor Milano, invitad per parlar del dopiaj cinematografeg ind la soa varietaa texinesa. L’è staita una conferenza interessanta, cont una quai anticipazion sora el prossim dopiaj e qe l’ha trasformad un ultim martedì de febrar ind una serada memorabil.

Sì perqè i conferenze g’inn ogni ultem martedì del mes e principien ai h21:15 per permeter a tuts de rivar a Monça. Una quai conferenza l’è staita anca rejistrada e publegada in sul YouTube.

La nosta lengua lombarda l’è bella e viva e quest a l’è dimostrad da la partecipazion atenta del publeg, qe al riva da diverse bande de la rejon.

I patrimoni lenguisteg i g’hann de vesser rispetads e protejuds e droevar la soa lengua a l’è un dirit inalienabil de ogni individov. In Italia esisten anc’mò paregie lengue autoctone qe i g’hann mìa qei dirits qì, intra i quai g’è el Lombard. Per salvar la nosta lengua besogna far soratut tre robe: drovar-la, drovar-la e poe drovar-la anc’mò, in tute i situazion comunegative, senza vergogna. A l’è anca per quest qe, olter a vesser una operazion cultural segnifegativa e importanta, i conferenze inn anca semplicement una ocasion de tirar foera la lengua, una bella manera per parlar-la anc’mò con coraj e consapevoleza. Partecipar a l’è un moment piacevol qe consili a tuts. Ve speitom !

CONFERENZE, MilesiLab,
via sirtori, 1, Monça
(info: calcatrapola@gmail.com)
    • 26 MARS 2013, Ornella Fiorini- Una mimosa per ti
    • 23 APRIL 2013, Alberico Guerzoni- La moda in Lombardia: dal coaçon sforzesc a la sperada
    • 28 MAJ 2013, Antonio Colombo- Ansia e depression


frill

Ultime Offerte

Torta al cioccolato

Dopo un buon pranzo è quasi d'obbligo un buon dessert, siamo sul classico,..
Vetrina del gusto / Offerte

Antipasti di salumi vari

Ecco a voi una selezione di salumi per cominciare a stuzzicare il palato,..
Vetrina del gusto / Offerte

Stinco di maiale

Un classico delle nostre zone, solitamente proposto accompagnato da patate al forno o..
Vetrina del gusto / Offerte

Coniglio al tegame

Quanto sapore in queste parti di coniglio al tegame, insaporiti dalle nostre spezie.
Vetrina del gusto / Offerte